Est 9 | NdeIBE | STEP | Ngelanga letshumi lantathu ngenyanga yetshumi lambili, inyanga ethiwa ngu-Adari, isimemezelo somlayo wenkosi kwakufanele senziwe. Ngalelilanga izitha zabaJuda zazikade zithemba ukubanqoba, kodwa kwaba lokuguquka abaJuda baba yibo abanqoba labo ababebazonda.

Esther 9

Ukunqoba kwabaJuda

1 Ngelanga letshumi lantathu ngenyanga yetshumi lambili, inyanga ethiwa ngu-Adari, isimemezelo somlayo wenkosi kwakufanele senziwe. Ngalelilanga izitha zabaJuda zazikade zithemba ukubanqoba, kodwa kwaba lokuguquka abaJuda baba yibo abanqoba labo ababebazonda. 2 AbaJuda babuthana kumadolobho abo kuzo zonke izabelo zeNkosi u-Ahasuweru ukuhlasela labo ababefuna ukubachitha. Kakho owayengamelana labo, ngoba abantu bezizwe zonke ezinye babebesaba. 3 Kwathi zonke izikhulu zezabelo, iziphathamandla, ababusi kanye lezisebenzi zenkosi bancedisa abaJuda, ngoba besesaba uModekhayi.

4 UModekhayi wayesengumuntu omkhulu esigodlweni; udumo lwakhe lwamemetheka kuzo zonke izabelo, waba lamandla amakhulu kakhulu.

5 AbaJuda bachithiza babulala izitha zabo zonke ngenkemba, benza intando yabo ezitheni ezazibazonda.

6 Esigodlweni saseSusa, abaJuda babulala njalo bachitha amadoda angamakhulu amahlanu.

7 Babulala njalo uPharishandatha, uDalifoni, u-Asiphatha, 8 uPhoratha, u-Adaliya, u-Aridatha,

9 uPharimashitha, u-Arisayi, u-Aridayi loVayizatha, 10 amadodana alitshumi kaHamani indodana ka-Hamedatha, isitha samaJuda. Kodwa abazange bayithathe impango.

11 Inani lalabo ababulawayo esigodlweni saseSusa labikwa enkosini ngalonalelo langa.

12 Inkosi yathi eNdlovukazini u-Esta, “AbaJuda sebebulale bachitha amadoda angamakhulu amahlanu kanye lamadodana kaHamani alitshumi enqabeni yaseSusa. Kuyini asebekwenze kwezinye izabelo zenkosi? Tshono, siyini isicelo sakho? Uzakunikwa. Kuyini okucelayo na? Lakho uzakwenzelwa.”

13 U-Esta wathi, “Nxa kuyithokozisa inkosi, phana imvumo kubaJuda abase-Susa ukuthi benze isimiso somlayo lo kusasa njalo, uvumele ukuba amadodana kaHamani alitshumi alengiswe esakhiweni sokulengisa.”

14 Inkosi yalaya ukuba kwenziwe lokho. Isimiso somlayo samenyezelwa eSusa, alengiswa amadodana kaHamani alitshumi. 15 AbaJuda baseSusa bahlangana ndawonye ngelanga letshumi lane ngenyanga ethiwa ngu-Adari, babulala amadoda angamakhulu amathathu eSusa, kodwa abazange bayithinte impango.

16 Kusenjalo, abaJuda ababesele ezigabeni zenkosi babehlangene labo ukuzivikela lokuthi bathole ukuphumula ezitheni zabo. Babulala izinkulungwane ezingamatshumi ayisikhombisa lanhlanu kodwa kabazange bayithinte impango.

17 Lokhu kwenzakala ngelanga letshumi lantathu ngenyanga ethiwa ngu-Adari, kwathi ngelanga letshumi lane baphumula balenza ilanga lentokozo ledili.

Idili LePhurimi

18 AbaJuda baseSusa bona babehlangene ngelanga letshumi lantathu leletshumi lane, kwathi ngeletshumi lanhlanu baphumula balenza laba lilanga lentokozo ledili.

19 Yikho lokho abaJuda abahlala emaphandleni, labo abahlala emakhaya bathakazelela usuku lwetshumi lane olwenyanga ka-Adari njengelanga lentokozo ledili, ilanga lokuphana izipho. 20 UModekhayi wabhala ngalezizinto, wasethumela izincwadi kuwo wonke amaJuda kuzo zonke izabelo zeNkosi u-Ahasuweru, eziseduze lezikhatshana, 21 ukuthi babeledili lokuthokoza minyaka yonke ngamalanga etshumi lane letshumi lanhlanu kunyanga ethiwa ngu-Adari 22 kube yisikhumbuzo sesikhathi lapho abaJuda bathola ukuphumula ezitheni zabo, njalo kuyinyanga lapho usizi lwaba yintokozo lokulila kwaba lilanga lokujabula. Wababhalela ukuba bakhumbule lawo malanga abe zinsuku zokuthokoza lamadili njalo baphane izipho zokudla baphe izipho kubayanga.

23 Ngakho abaJuda bavuma ukuqhubeka ngamadili entokozo ababewaqalile, besenza lokho uModekhayi ayebabhalele ngakho.

24 Ngoba uHamani indodana kaHamedatha, um-Agagi, isitha samaJuda wonke, wayecebe ukubachitha abaJuda njalo wayenze inkatho okuthiwa yiphuri eyadala ukubhujiswa lencithakalo yabo. 25 Kodwa kwathi icebo lelo selivelile enkosini, yathumela imilayo ebhaliweyo ukuthi amaqhinga amabi kaHamani ayekade ewamisele abaJuda acine esephendukela yena, njalo yena lamadodana akhe balengiswe endaweni eyakhelwe lokho.

26 (Ngakho amalanga lawo athiwa yiPhurimi, kusuka ebizweni elithi phuri.) Ngenxa yakho konke okubhalwe encwadini le lakho konke ababekubonile lokwakwenzakale kubo,

27 abaJuda bakwenza umlandu wabo ukuthi baqalise umkhuba wokuthi bona kanye lezizukulwana zabo labo bonke abahlangana labo kumele loba kutheni baphumule ngezinsuku lezi ezimbili minyaka yonke, ngendlela eyayimisiwe langesikhathi esasiqanjiwe. 28 Amalanga la kumele akhunjulwe njalo alandelwe kuzo zonke izizukulwana zezimuli zonke, ezifundeni zonke. Akumelanga amalanga la ePhurimi ayekelwe ukuthokozelwa ngabaJuda, loba ukuthi isikhumbuzo sawo sikhohlakale sife kuzizukulwana zabo.

29 Ngakho, iNdlovukazi u-Esta, indodakazi ka-Abhihayili, kanye loModekhayi umJuda, babhala ngegunya eligcweleyo isiqiniselo sencwadi yesibili eyayimayelana lePhurimi.

30 UModekhayi wathumela izincwadi kubo bonke abaJuda ezifundeni ezilikhulu elilamatshumi amabili lesikhombisa embusweni ka-Ahasuweru, amazwi ayebafisela inhlalakahle njalo ebaqinisa – 31 ukuba lezinsuku zePhurimi ngezikhathi ezazimisiwe, njengokumemezela kuka-Modekhayi umJuda leNdlovukazi u-Esta, lanjengalokhu ababeziqalisele khona kanye lezizukulwana zabo mayelana lezikhathi zokuzila lokulila.

32 Isimemezelo sika-Esta saqinisa imithetho le emayelana lePhurimi, kwalotshwa phansi emibhalweni.